Nest etter den årlege TV-aksjonen er fasteinnsamlinga for Kirkens Nødhjelp landets største. Sokna i Surnadal og Rindal førebur no stor innsats tysdag 19. mars.
Konfirmantar og foreldre er hovudaktørar i dør-til-dør-aksjonen der over tusen av landets menigheter deltek.
Kirkens Nødhjelp er gjennom sitt nettverk ein maksimalt effektiv organisasjon. Etter verksemd i over 50 år kan KN vise til store resultat - både ved akutte katastrofer og i langsiktig arbeid for å skaffe vatn og livsvilkår i område med svolt og nød.
Hjelpa er ikkje «øremerka», men går alltid dit det trengst mest. Likevel er «Håp i ein drope vatn» eit aktuelt motto også i år.
Over 130.000 i fjor
- I fjor samla Surnadal inn over 130.000 kroner, fortel diakon og koordinator Gro Hauge Venås.
- Omrekna etter KN sin statistikk betyr det f eks varig vassforsyning til 550 tørkeramma personar.
På onsdagens førebuingsmøte deltok KN-kontaktar frå Rindal, Mo, Øye-Ranes, Todalen, Stangvik og Åsskard. Dei fekk orientering om organisasjon sitt arbeid og idear til sokna si innsamling. Bøsser, plakatar og anna materiell vart utdelt.
Lokale KN-kontaktar klare til innsats. Frå venstre Erik Meisingset (Mo sokn), Gro Hauge Venås (aksjonsleiar), Torunn Eriksen (Rindal), Anita Talgø (Todalen), Liv Marit Polden og Stig Sæter (Øye-Ranes) og Roar Helge Ansnes Halle (Stangvik).
Ørken blir hage
Gro Hauge Venås viste også videoar der mottakarar av KN-midlar fortalte om epokegjerande resultatet av fasteaksjonen. Ein 15-åring i Tanzania som før måtte gå 4 timar dagleg etter vatn, synte med fryd korleis det er å opne ein vasskrane heime. Ei jente i Libanon viste deira frodige frukthage der det for 4-5 år sia var tørr og livlaus ørken.
Treng også frivillige
Konfirmantane er bøsseberarar - ei viktig tenesteoppgåve dette året. Heimane skaffar skyss. Kyrkjesokna er inndelt i praktiske «roder» der jobben er jamnt fordelt. Men mange plassar er det så få konfirmantar at sokneråda no oppfordrar frivillige vaksne om å hjelpe til.
– Har venta!
Fredag 15. mars arrangerer kyrkja informasjonsmøte på Surnadal vidaregåande skule - med filmsnuttar og ein skikkeleg «pep-talk». Sjølve dør-til-dør-aksjonen skjer altså tysdagen etter, 19. mars, frå klokka 17 og utover. Folk kan gi kontantar i bøssene, nytte vipps (2426) eller eventuelt annan betalingsmåte.
Håpet er også denne gong at innsamlarane blir møtt på den positive måten dei ofte opplever: - Så bra at de kjem. Vi har venta på dykk!
…..Tekst/foto a-b-c Bernt G. Bøe, KN-kontakt i Åsskard …
Foto: Kirkens Nødhjelp
Nesten 800 millioner mennesker lever uten tilgang til rent vann i verden i dag pga. jordskjelv, tørke, flom, krig eller konflikt. Kirkens Nødhjelp jobber med akutt bistand i katastrofer og med langsiktige prosjekter for å redusere nød og fattigdom i verden. Vi jobber for fred og rettferdighet, og for å redde liv.